Naging masaya naman ako ngayong linggong ito. Kahit papaano ay napalipas ko naman ito nang may naiwang mga pangyayaring hinding hindi ko malilimutan.

Noong Lunes ay maaga akong nakarating sa eskwelahan. Tamang-tama at nagbigay pugay kami sa minamahal naming Inang Bayan noong umagang yaon. Tila maliwanag at may pagka-mainit ang araw na iyon pero sa kabila ng lahat ng ito ay naging masaya naman ang umpisa ng aking linggo. Sa unang asignatura ay nagkaroon kami ng mahabang pagsusulit sa pagsasagawa ng isang websayt. Hindi ko mapaliwanag kung ano ang naramdaman ko noong panahong iyon; ang alam ko lang ay naguguluhan pa rin ako sa ibang kowd doon. Pagtapos ay nagtungo na kami sa SHB para sa aming klase sa Pisika. Inakala kong mahuhuli na kami sa klase ngunit ako ay nagulat nang makita kong nakaalis na pala ang Charm dahil nakita ko sila sa kwartong pang-STR. Sa araw na ito ay tinapos na rin namin ang aming diskusyon tungkol sa librong nagsasaad ng kwento ni Job. Ito ay higit kong ikinatuwa pagkat ako ay sabik na sabik na talaga sa aming paglipat sa Iliad.

Kinabukasan, nagkaroon naman kami ng mahabang pagsusulit sa Biyolohiya. Sa araw ring ito ay ipinaliwanag ko sa mga kaklase ko sa elektib kung ano nga ba ang mga sinasagisag ng mga elementong inilagay ko sa aking unang proyekto. Sa hapon ay nagkaroon lamang kami ng laro laban sa seksyong Truth. Sa kabila ng pagkakaroon namin ng maagang uwian ay napilitan pa rin kaming manatili sa eskwelahan upang mag-isip at mag-saliksik ng magandang paksa para sa aming STR. Di naglaon ay nakaisip din kami ng isa sa aking mga ka-grupo.

Noong Miyerkules, nagsimula na ang aming diskusyon sa Iliad. Inumpisahan ito sa pamamagitan ng pag-ulat ng dalawa sa aking mga kaklase tungkol sa labindalawang diyos at diyosa ng mitolohiyang Griyego at Romano pati na rin ang paghuhusga ni Paris kung sino ba talaga ang karapat-dapat makatanggap ng ginintuang mansanas na siyang iproproklamang pinakamagandang diyosa sa lahat. Sa araw na ito, unti-unti akong naliwanagan tungkol sa mga bagay-bagay na tila bumabagabag sa akin simula noong una kong magisnan ang isang misteryosong tao sa eskwela.

Sumapit na ang Huwebes at ako ay kinulit pa rin ako ng mga matalik kong mga kaibigan tungkol sa bagay na bumagabag sa akin. Pero bago ako tuluyang naliwanagan ay nagkaroon muna kami ng mahabang pagsusulit sa Matematika. Pagtapos ng elektib ay wala na kaming klase pagkat sa Biyolohiya ay wala ang aming guro at sa Ekonomiks naman ay may pinapagawang aktibidad ang aming guro. Bago pa man magtapos ang araw na ito ay nakayanan ko na rin bumigay sa pagkikipkip ko sa mga tunay kong pagkakaunawa sa tila ba parang kuryenteng gumugulat sa akin sa tuwing naiisip ko ang bagay na bumagabag sa akin. Sinabi ko ang mga nararamdaman ko sa aking tatlong matalik na kaibigan. Ang isa sa kanila ay nakasama kong maglibot sa eskwelahan pagsapit ng hapon at maniwala man kayo o hindi, naikot namin ang buong paligid SHB ng sampung beses.

Kanina naman ay naging maayos at masaya ang mga pangyayari. Sa Filipino ay nagkaroon kami ng bugtungan. Sabik na akong ituloy ang ito upang mabigay na talaga namin ang lahat ng aming makakaya upang manalo sa paligsahang ito. Naging mahaba rin ang aming libreng oras ngayon. Naging tuluy-tuloy na apat na oras ang aming natanggap na pahinga. Ang natirang asignatura na lamang ay Kimika at CAT. Noong CAT namin ay may napansin akong mga mas nakakabatang estudyanteng tila ba sabik at tuwang-tuwa sa aming mga ginagawa na dumating na sa puntong ginaya nila kami at sinaluduhan. Nakakatuwa naman sila. Mga atat makarating sa ika-apat na taon sa mataas na paaralan samantalang kami naman ay nangangarap bumalik sa nakaraan at pabagalin ang oras.

Bukas ay 07/07/07. Hindi ba't nakakaaliw ang petsang ito. :)

Labels: Electron, friends, random, recap, school